काठमाडौं । भूमि प्रशासन कार्यालय कलंकी र मनमैजु लामो समयदेखि कार्यालय प्रमुखविहीन बनेका छन् । दुवै कार्यालयमा प्रमुख पद खाली हुँदा सेवा प्रवाह प्रभावित भएको कर्मचारीहरू बताउँछन् ।
बिज्ञापन
भूमि प्रशासन कार्यालय मनमैजुमा भने नयाँ कार्यालय प्रमुख पठाउने विषयलाई लिएर मन्त्रालयभित्र तीव्र चलखेल भइरहेको स्रोतको दाबी छ । स्रोतका अनुसार हाल कास्कीस्थित कार्यालयमा कार्यरत कालीबहादुर भुजेललाई मनमैजु ल्याउन भूमि व्यवस्था मन्त्रालयका सचिव मदन भुजेलले विशेष चासो दिएका छन् । कालीबहादुर भुजेल सचिव मदन भुजेलका भाइनाता पर्ने भएकाले सरुवामा अस्वाभाविक सक्रियता देखिएको आरोपसमेत कर्मचारी वृत्तमा चर्चामा छ ।
बिज्ञापन
कर्मचारीहरूका अनुसार मनमैजु कार्यालयमा कालीबहादुर भुजेललाई ल्याउन अनौपचारिक लबिङसमेत भइरहेको छ । यद्यपि मन्त्रालयले यस विषयमा औपचारिक निर्णय भने सार्वजनिक गरेको छैन ।
यता भूमि प्रशासन कार्यालय कलंकीमा भने कार्यालय प्रमुख पठाउन मन्त्रालयलाई सकस परेको बताइएको छ । केही समयअघि आगलागीको घटनाबाट प्रभावित उक्त कार्यालयमा काम गर्ने वातावरण सहज नभएको भन्दै अधिकांश कर्मचारी त्यहाँ जान इच्छुक नदेखिएको कर्मचारी स्रोतको भनाइ छ । कार्यालयको भौतिक अवस्था र व्यवस्थापन समस्याका कारण प्रमुख तहका कर्मचारी समेत त्यहाँ जान अनिच्छुक रहेको बताइन्छ ।
बिज्ञापन
यसैबीच काभ्रे मालपोत कार्यालयमा कार्यरत रामबहादुर शाहीलाई सहकारी विभागमा सरुवा गरिएको छ । शाहीको स्थानमा हरिकृष्ण सुवेदीलाई काभ्रे पठाइएको स्रोतले जनाएको छ ।
